جۆری توێژینه‌وه‌ : هه‌ڵێنجراو له‌ نامه‌ی ماسته‌ر

نوسه‌ران

• عیشى عبدالقهار عبدالرحمن ¹
• مأمون عبدالصمد محمد ²

¹ پشکا خواندنێن ئاشتى ومافێ مروڤى، کولیژا زانستێن مروڤایەتى، زانکویا دهوک، هەرێما کوردستان- عێراق

² پشکا خواندنێن ئاشتى ومافێ مروڤى/ کولیژا زانستێن مروڤایەتى/ زانکویا دهوک/ دهوک/ هەرێما کوردستان/ عێراق

پوخته‌

ئەڤ ڤەکۆلینە، ب ئارمانجا سەرەکی یا شیکارکرن وتێگەهشتنەکا کویرە ژ سروشت وڕەنگڤەدانێن وێ پەیوەندیا ئاڵۆز یا کو هەی د ناڤبەرا دیاردا بێکاریێ وهەروەسا توندوتیژیا خێزانی دا، ب تایبەتی ل سنۆرێ سەنتەرێ باژێرێ دهۆکێ. ژ بۆ گەهشتن ب ئەنجامێن زانستی، ڤەکۆلینێ پشت بەستن ب رێبازا وەسفى- شیکارى کریە، سەرباری بکارئینانا دیزاینێ تێکەڵ (واتە ئێکخستنا هەر دوو لایەنێن چەندایەتى وچەواتى) د پرۆسەیا کومکرن وشیکارکرنا داتایان دا. ئەڤ یەک ژی ب رێکا ئەنجامدانا راپرسیەکا بەرفرەهـ کو ژ (٩٣١) بەشداربوویان پێکهاتیە هاتە کرن، دگەل ئەنجامدانا چاڤپێکەفتنێن کویر وتێروتەسەل دگەل (٦) پسپۆر وشارەزایێن تایبەتمەند د ڤی بۆارێ ناڤبرى دا.
دەرئەنجامێن ڤەکۆلینێ ب ڕوونی دیارکر کو بێکاریا درێژخایەن (ئەوا پتر ژ سالەکێ ڤەدکێشیت) فاکتەرەکێ سەرەکی وکاریگەرە د دروستبوونا فشارێن دەروونی یێن دژوار ودبیتە ئەگەرێ هەڕفتنا هەرەمێ پێتڤیێن مرۆڤی (ل دویڤ تیۆرا ماسلۆ)، وئەڤ چەندە ب شێوەیەکێ راستەوخۆ وەك توندوتیژی دناڤ خێزانێ دا ڕەنگڤەدەت. هەروەسا ژ لایەکێ دیڤە دیار بوو کو زەلامێن بێکار، ژبەر وان فشارێن کەلتووری یێن ل سەر هەی وتێکچوونا وێنەیێ نەریت یێ (نانپەیداکەر)ی، تووشی قەیرانا ناسنامەیێ دبن. لەورا ئەڤ زەلامە پەنایێ بۆ توندوتیژیێ د بەن وەك میکانیزمەکا بەرەڤانیێ بۆ قەرەبووکرنا وێ دەستهەڵاتا هاتیە ژدەست دان وسەپاندنا خۆ. ل دوماهیێ، ڤەکۆلین پێشنیارا ئاڤاکرنا تۆڕا پاراستنا جڤاکی د بیاڤێ کارکرنێ دا دکەت، ودگەل پێتڤیبوونا داڕشتنەڤەیا دیتنا جورێ جڤاکى (جێندەری) بۆ بابەتا کارکرنا ژنان، ژبەر کو کارکرنا ژنێ دشێت وەك فاکتەرەکێ پارێزەر وپاڵپشت بۆ مان وسەقامگیریا خێزانێ ڕۆڵەکێ ئەرێنی بگێڕیت.

وشه‌ بنچینه‌ییه‌كان

• بێکارى
• توندوتیژیا خێزانى
• فشارێن ئابوورى
• پیڤەرێن کەلتورى
• کارتێکرنا دەروونى