جۆری توێژینهوه : ههڵێنجراو لهتێزی دكتۆرا
نوسهران
1 بەشێ زمانێ كوردى، كوليژا زمانان زانكۆيا دهۆك، ههرێما كوردستانێ، عيراق.
2 بەشێ زمانێ کوردی، کۆلیژا زمانان، زانکۆیا نەورۆز، دهۆک، هەرێما کوردستانێ، عیراق
پوخته
د جیهانا ڕۆمانا ژناندا، زەلام نه ب تنێ كارەكتەرەكە، بهلكو سێبهرهكه و تەوەرهکێ سەرەکییە. ژبەرکو ئەو پێکهاتەکێ گرنگە ژیانا ڕاستەقینە یا ژنێيه، ژنا نڤیسهر ل دویڤ دلخۆشی یان ئێشانا خۆ ژ زەلامی، ب پێنڤیسا خۆ، یان دكهته نموونهیا باشییێ، یانژی سیمبۆلا خرابیێ ب ڕهنگێن جوان، یان نهجوان وێنه دكهت. ئەڤ ڤەکۆلینە بزاڤەکە بۆ دیارکرنا وێنەیێ زەلامی د رۆمانا (ڕەڤین ژ خۆلەکێن زەر) یا ئاواز موستەفا بەرواری، ئایا ڕۆماننڤیس د ڕۆمانا خۆدا وێنەیێ زەلامی ل سەر چ بنەمایان ئاڤا دکەت و ب چ ڕەنگێن هۆنەری ئهوی بەرجەستە دکەت؟ ڤەکۆلین پشتبەستنێ ل سەر ميتودا وهسفى- شرۆڤهكارى دکەت، وێنەیێ زەلامی و چاوانییا بەرهەمهێنانا ئهوی د ڕۆمانێدا دهێتە وەسفکرن. پاشان د چارچۆڤێ ڕهخنهيا ئهدهبى يا فێمينيستیدا، وێنه دهێنه شرۆڤەکرن داکو ڕەهەندێن هۆنەری و پەیاما ڕەخنەیی یا نڤیسەری ل سەر سیستەمێ جڤاکی بهێتە ئاشکراکرن.
ڤهكۆلينه ژ پێنج تهوهران پێكدهێت: تهوهرێ ئێکێ: نڤیسینێن ژنان، وەک دەروازەیەکا تیۆری بۆ شرۆڤەکرنا چەمک و ديرۆکا ئەڤێ ڕەوتا ئەدەبی-فێمینیستی؛ تهوهرێ دوویێ: ڕۆمانا ژنان ڤەکۆلینا ديرۆکا دەرکەڤتنا درەنگ و ئاستەنگێن بەردەم ڕۆمانا ژنێیە د ناڤا ئەدەبیاتا کوردیدا؛ تهوهرێ سییێ: وێنە، وەک ئامرازێ سەرەکی یێ شرۆڤەکرن و ڕەخنەکرنێ؛ تهوهرێ چوارێ: پێگەهێ ژنێ د جڤاکێ کوردەواریدا، زەمینێ جڤاکی و دیرۆکی یێ کارى دیاردکەت، تهوهرێ پێنجێ: وێنەیێ زهلامى د ڕۆمانێدا، کو دگەهیتە کرۆک و شرۆڤەکرنا پراکتیکی یا ڤەکۆلینێ. ڤەکۆلینێ سەلماندییە ڕۆماننڤيس، ب ڕێكا هونهرێ ههڤدژیێ وێنەیێ زەلامی یێ گشتی و نێگەتیڤ وەک سیمبۆلا جڤاکی دادینیت، ل هەمبەر وێنەیێ وی یێ پۆزەتیڤ و دهگمهن وەک ئێکانه پەناگەهـ، لهورا چارەنڤیسێ تراژیدی یێ قارەمانێ و پەنابرن بۆ "دیناتیێ"، نە شکەستنەکا کەسییە.
وشه بنچینهییهكان
)